Strangebrew at ang Halaga ng Saya

Pasensiya na medyo matagal na rin akong hindi sumusulat dito ah. Nakakain kasi ang oras ko nga mga kung anu-ano sa eskuwela. Ang maganda naman doon, marami akong nakakalap na bagong pagkatuto na puwedeng pag-isipan. Kaya ito, mag-Filipino muna tayo.

Napanood niyo na ba iyong Strangebrew nina Tado at Erning, iyong pinalabas dati sa UNTV, tapos sa Studio 23? Sa nakaraan linggo kasi, nagkaroon ako ng pagkakataon na balikan iyong mga lumang episode nito. Natutuwa naman ako, kasi ang sasaya ng mga episode noon, at kakaiba rin talaga ang lapit nila sa pagkalap ng impormasyon sa pamamagitan ng mga panayam, at pag-arte nang nakakatawa. Kung ako sa inyo, papanoorin ko ngayon iyong mga lumang episode noon sa Youtube. May naglagay.

Kaya bigla naman akong nahumaling muli sa Strangebrew ay sa klaseng Filipino kasi namin, naisip namin ng kaklase kong si Jico na iyon ay gawing presentasyon sa isang sagala sa loob ng paaralan. Subalit, bago namin ito magawa, kailangan namin makumbinsi ang kagawaran na may kahalagahan ang napili naming tema para sa manoonood na Pilipino. Naisip namin na baka naman may matututunan ang manonood sa kung anu-anong pinag-uusapan sa Strangebrew. Totoo naman, na sa dinami-raming nironda nina Tado, marami nga namang matututunan ang mga manonood hinggil sa Maynila at iba pang lugar, sa nakakatawang paraan pa. Matutuwa na nga sila, matututo pa ng bago. O 'di ba? Puwedeng puwede?

Kaso, naisip ko rin na sa kahit anong bagay naman may matututunan ka 'di ba? Kahit na yata sa simpleng pagkain ng tsokolateng Magic Flakes, may matututunan kang bago 'di ba, kahit gaano kaliit? 'Di ba? TAMA! Kaya ito, kailangan pa naming isipin kung ano ang iba pang kahalagahan ng Strangebrew.

Bakit nga ba pinapanood ang Strangebrew? Dahil kay Tado 'di ba? Dahil kay Erning 'di ba? Dahil kay Jun Sabayton at Ramon Bautista 'di ba? TAMA! Natutuwa talaga tayo sa kakaibang lapit ng Strangebrew sa mga pinakakaraniwang bagay. Nakakatuwa siya. Papanoorin ba natin ang palabas na iyon kung gusto lang natin matuto ng tungkol sa Tubero, Barko, at MRT? Malayo yatang magkaganoon. Sobrang astig ng pagkakagawa ng Strangebrew kaya tayo na-hook. Iilan lang ang kagaya ng Strangebrew kaya natin siya pinanood. Bago ang konseptong iyon noong panahong iyon, at natuwa tayo. Masaya lang tayong panoorin iyon.

Ba't nga ba ako naghahanap pa ng ibang kahalagahan? Napakahalaga nga pala ng kasiyahan, lalo na kung kakaiba ito. 'Di ba nga ang karamihan ng tao, naghahanap lang ng kasiyahan sa buhay? Iyong iba nga, kapag masaya na, wala nang ibang hinahanap eh.

Minsan, natatandaan ko, parang natanong ni Tado sa Strangebrew sa isang taong mahilig makipag-gagambahan (o larong pinaglalaban ang mga gagamba) kung ano ang maitutulong ng ginagawa niya sa bayan. Siguro, naisip ng taong iyon, kahit hindi niya marahil nasabi, na "Masaya ito eh." Iyon na iyon.

Kaya kapag oras mo nang matanong ukol sa ginagawa mo, huwag kang mag-alinlanngang sabihing, "Masaya eh," lalo na kung ito ang totoo.